O ateneo

Ateneo Engranaxe

O Ateneo Libertario A Engranaxe nace como un espazo destinado á cultura libre, o debate e o pensamento crítico. Un proxecto que, a través de recitais, palestras, talleres, proxeccións e dun humilde fondo bibliotecario, pretende facer do barrio un lugar máis humano, no que persoas de diferentes culturas e xeracións poidan compartir coñecementos, experiencias e sentimentos de solidariedade e apoio mutuo.

A meirande parte das actividades que desenvolvemos son de balde para as persoas socias e aquelas que, sen selo, non poden achegar a cantidade mínima para o mantemento do local. Non temos ningún afán comercial porque cremos que a cultura non é unha mercadoría, senón o patrimonio máis valioso que podemos construír colectivamente xunto coas e cos nosxs viciñxs.

  • Por que criamos este espazo?

Vivimos nunha sociedade na que as persoas están encerradas en espazos que as incomunican e socializan en relacións autoritarias. Deste modo, vemos como os nosos benqueridxs anciáns, dxs que poderiamos aprender tanto, están illadxs en asilos; mentres, xs adultxs pasan o día realizando pesados e repetitivos traballos ou no paro, desmotivadxs, tristes e sen expectativas vitais. Doutra banda, a rapazada que, ata ben pouco xogaba ás agachadas e ao pilla pilla na rúa, agora atópase diante de pantallas que educan en valores competitivos, violentos e machistas.

Criamos este espazo para unir o que separou o mercado e os valores a el asociados: individualismo, apatía existencial, irresponsabilidade social, consumismo, inacción política e amnesia histórica no respecto das loitas que xs nosxs antepasadxs libraron en nome da liberdade, da xustiza e da igualdade.

  • Que queremos facer?

Queremos un BARRIO SOLIDARIO, onde as persoas se axuden mutuamente e afronten os problemas de xeito colectivo.

Queremos un BARIO TOLERANTE con todas as persoas que habitan nel, independentemente da súa idade, das súas capacidades ou da súa condición sexual, étnica ou relixiosa.

Queremos un BARRIO QUE LOITE contra as inxustizas, a precariedade material, a indiferenza ante a dor allea, a falta de esperanza, a destrución do noso territorio natural, o roubo descarado da Banca e a expropiación da nosa capacidade para decidir por parte de partidos políticos mafiosos e arrogantes.

Queremos un BARRIO ORGANIZADO POR E PARA O NOSO POBO, no que promover a nosa lingua, no que se recuperen tradicións comunais que dotaban de sentido á vida, no que a cultura se deixe de presentar como mero folclore para converterse nunha arma afiada contra o Progreso e o Capitalismo caníbal que padecemos.

Queremos un BARRIO FEMINISTA, que faga visibles as violencias machistas normalizadas na nosa sociedade, para combatelas como mulleres libres e empoderadas que anhelan un horizonte de igualdade fraternal entre homes, mulleres, trans e queer.

Queremos un BARRIO ANTIESPECISTA que trate a todos os seres vivos con respecto e dignidade.

  • Queres participar?

Podes achegarte a calquera das actividades que verás anunciadas na porta do local, nesta web ou no noso Facebook. Estaremos encantadxs de recibirte e poder compartir contigo novas ideas para facer deste barrio un lugar mellor.

  • Cando abrimos?

O ateneo está aberto os días de actividades e os días de biblioteca (tódolos Martes dende ás 18:30 ás 21:00).